រឿងអប់រំខ្លី៖ សត្វស្វា និងកសិករដាំពោត
កាលមួយនោះ មានសត្វស្វាមួយហ្វូងមានការសប្បាយចិត្ដជាខ្លាំងក្រោយបានឮថា កសិករដែលធ្លាប់ដេញវាចេញពីចំការពោតរបស់គាត់ជារៀងរាល់ថ្ងៃបានទទួលមរណៈភាពបាត់ទៅហើយ។ ដូច្នេះ ពួកវាក៏បានរាំលោតហ៊ោកញ្ជៀដោយសេចក្តីរីករាយយ៉ាងក្រៃលែង ដោយគិតថាលែងមានអ្នកដេញ និងរំខានពួកវាបន្តទៀត ហើយអាចស៊ីពោតឆ្អែត តាមចិត្តចង់។
ផ្ទយទៅវិញ ពួកវាភ្លេចគិតថា បើគ្មានកសិករជាអ្នកដាំពោតបន្តទៀតទេ វាក៏គ្មានចំណីស៊ីដូចគ្នាដែរ។ ចាំដល់រដូវដាំពោតឆ្នាំក្រោយៗ មកទៀតមិនមានពោតស៊ីជាចំណីទាល់តែសោះ ព្រោះតែគ្មានអ្នកដាំទៀត។ ពេលនោះហើយដែលពួកវាដឹងថាកសិករដែលពួកវាគិតថាជាសត្រូវហើយ ដែលពួកវាអរសប្បាយនឹងការស្លាប់របស់គាត់ជាអ្នកដាំ។ ហេតុនេះហើយធ្វើឱ្យពួកវាមានការលំបាកក្នុងរកចំណីខ្លាំងណាស់ រហូតខាតបង់អ្នកជួយផ្ដល់ចំណីរបស់កូនៗទៀតផង។
សរុបជារួមនៅក្នងសង្គមមនុស្សជុំវិញខ្លួនអ្នក ប្រហែលជាពួកគេមិនយល់ឬមើលមិនឃើញពីតម្លៃនៃសកម្មភាពរបស់អ្នកនៅថ្ងៃនេះទេ។ ប៉ុន្តែពួកគេនឹងដឹងហើយទទួលស្គាល់សារៈសំខាន់របស់អ្នកនៅពេលដែលអ្នកលែងនៅក្បែរ និងពេលគ្មានអ្នកជួយដល់ពួកគេ។
ដូច្នេះហើយពេលខ្លះ អ្នកដែលបដិសេធ ឬប្រឆាំងនឹងអ្នក គឺអាចជាអ្នកដែលជួយអ្នកទៅវិញទេ ភាគច្រើនក៏មានដែរ។
