បរទេស Japan៖ប្រទេសជប៉ុនគ្រោងសាងសង់ផ្លូវរថភ្លើងធុនស្រាលនៅតំបន់ភ្នំ Fuji ដ៏ល្បីល្បាញរបស់ខ្លួន។
អន្តរជាតិ: យោងតាមរបាយការណ៍ថ្មីមួយរបស់រដ្ឋបាលក្នុងតំបន់មូលដ្ឋានបានបង្ហាញឱ្យដឹងថា ប្រទេសជប៉ុនគ្រោងសាងសង់ គម្រោងផ្លូវរថភ្លើងធុនស្រាល ដើម្បីតភ្ជាប់ចេញពីជើងភ្នំ Fuji ទៅកាន់ស្ថានីយទី៥របស់ខ្លួន។ នេះបើយោងតាមទីភ្នាក់ងារសារពត៌មាន Kyodo News។
នៅពេលត្រូវបានសាងសង់រួចរាល់ ផ្លូវរថភ្លើងនេះត្រូវបានគេរំពឹងថា នឹងអាចដឹកជញ្ជូនអ្នកដំណើរ បានចំនួន៣,៣៦លាននាក់នៅក្នុងមួយឆ្នាំៗ។
បច្ចុប្បន្ន រដ្ឋបាលខេត្ត Yamanashi កំពុងស្នើសុំទៅកាន់រដ្ឋាភិបាលជប៉ុនថ្នាក់ជាតិ ដើម្បីសាងសង់ខ្សែផ្លូវរថភ្លើង ក្នុងគោលបំណងបំពេញតម្រូវការរបស់ភ្ញៀវទេសចរណ៍ ដែលចូលមកទស្សនាភ្នំ Fuji នៅរដូវក្តៅ។
មធ្យោបាយនេះក៏នឹងជួយថែរក្សាបរិស្ថាន តាមរយៈការកាត់បន្ថយនូវការបំភាយឧស្ម័ន ចេញពីរថយន្តផងដែរ។នេះបើយោងតាមរបាយការណ៍ បណ្តោះអាសន្នរបស់រដ្ឋបាលមូលដ្ឋាន។
ខ្សែរថភ្លើងនេះ នឹងធ្វើដំណើរតាមបណ្តោយ ផ្លូវបង់ប្រាក់ Fuji Subaru Line ទៅកាន់ស្ថានីយ៍ទី៥ ដែលជាចំណុចចាប់ផ្តើមទៅកាន់ផ្លូវថ្មើរជើង សម្រាប់ដើរឡើងទៅលើភ្នំ Fuji ដែលជាគោលដៅទេសចរណ៍ដ៏ល្បីល្បាញបំផុត។
រដ្ឋបាលខេត្ត Yamanashi បានប៉ាន់ប្រមាណថា ការសាងសង់គម្រោងនេះ នឹងត្រូវការចំណាយទុនវិនិយោគអស់ចំនួន១៤៨,៦ពាន់លានយ៉េន (ប្រហែល៩៧០លានដុល្លារ)។ រដ្ឋបាលខេត្ត Yamanashi ចាត់ទុកថា នេះជាជម្រើសដ៏ល្អប្រសើរបំផុតសម្រាប់រដ្ឋបាលមូលដ្ឋាន ក្នុងការសាងសង់ផ្លូវរថភ្លើង ដោយអនុញ្ញាតឱ្យក្រុមហ៊ុនឯកជនណាមួយ ដើរតួជាអ្នកគ្រប់គ្រងដំណើរការរថភ្លើង។
រដ្ឋបាលក្នុងតំបន់មូលដ្ឋាន បានប៉ាន់ប្រមាណទៀតថា ប្រសិនបើរថភ្លើងនេះ ទទួលបានអ្នកដំណើរចំនួន៣លាននាក់ក្នុងមួយឆ្នាំ នោះរដ្ឋបាលខេត្ត Yamanashi នឹងទាញបានប្រាក់ចំណេញ ប្រមាណ១៨៤,៨ពាន់លានយ៉េន ហើយប្រតិបត្តិករឯកជន នឹងទាញបានប្រាក់ចំណេញ ចំនួន៤២០,៧ពាន់លានយ៉េនក្នុងរយៈពេល៤០ឆ្នាំ។
យ៉ាងណាមិញ ដោយសារតែមានការជំទាស់ពីសំណាក់ក្រុមអ្នកស្រុក សាលាខេត្ត Yamanashi គ្រោងនឹងគូសបញ្ជាក់ទិសដៅអនាគត របស់គម្រោងខាងលើ នៅចុងឆ្នាំ២០២៤នេះ បន្ទាប់ពីទទួលបានមតិកែលម្អ។
លោក Kotaro Nagasaki អភិបាលខេត្ត Yamanashi បានថ្លែងនៅក្នុងសន្និសីទសារព័ត៌មានមួយ កាលពីចុងខែតុលាកន្លងទៅថា “ទោះបីជាមានឧបសគ្គយ៉ាងណាក្តី ប៉ុន្តែគម្រោងនេះនៅតែអាចសម្រេចបាន”៕ប្រភព: Kyodo៕
